2016 Bizi-lasterketa, mila milia minbizidun haurren alde

Aurreko sarreran aurtengo proiektuari buruzko zertzelada batzuk idatzi nituen, eta oraingo honetan bi zeharkaldi horiei buruzko datu zehatzagoak ematera nator. Aipatu bezala, egitasmoa bi zeharkaldik osatuko dute; bata, Alpeak gurutzatuz, Pirinioak gurutzatuz, bestea. Bi zeharkaldientzako data zehatzik ez dago  oraindik, baina seguruenik uztail edo abuztu aldean izango dira, eta Alpeetako zeharkaldia izango da bietatik egingo dudan lehenbizikoa.

ROUTE DES GRANDES ALPES

Zeharkaldia  2 egunetan egiteko asmoa daukat , gutxi gorabehera, 40 orduren azpitik eta lotarako geldialdirik egin gabe (Non-Stop). Suitza eta Frantziaren arteko mugan dagoen Lehman laku ertzetik abiatu eta Mediterranear itsasertzean kokaturik dagoen Menton herriraino. Alpeen zeharkaldian igo edo igaroko diren portuen zerrenda eta datuak:

PORTUA	LUZERA	%	DESNIBELA
Col des Gets	7,1 km	4,8	330m
Col de la Colombiere	16,3 km	6,8	1108m
Col des Aravis	19 km	4,6	866m
Col des Saisies	14,8 km	5	747m
Cormet de Roselend	20,3km	6	1227m
Col de L´Iseran	48km	4,1	1955m
Col du Telegraphe	11,8 km	7,3	856m
Col du Galibier	18,2km	6,8	1245m
Col de Izoard	20 km	5,7	1141m
Col de Vars	19,4 km	5,7	1111m
Col de la Bonette	24 km	6,6	1589m
Col  Saint Martin	16km	6,4	1025m
Col de Turini	15,3 km	7,2	1107m
Col de Castillon	7 km	5,1	359m

TRANSPIRENAICA

Helburua ibilbide osoa, gutxi gorabehera, 70-80 orduren bueltan egitea izango da, baina ikusiko dugu.... Portbou herrian abiatu eta Hendaian amaituko da. Hona hemen Transpirenaican igo edo igaroko diren portuen zerrenda eta datuak:

PORTUA	LUZERA	%	DESNIBELA
Palomiere	32 km	2,49	816m
Col de Jau	13,6 km	5,93	802m
Palheres	14,9 km	8,1	1207m
Col de Lers	11,5 km	7,01	807m
Col de Agnes	4 km	7,6	306m
Col de Latrape	5km	7,36	368m
Col de la Core	13,80 km	6,41	885m
Portet de Aspet	18,1 km	3,1	527m
Col de Mente	10,9 km	6,67	717m
Port de Bales	18,90 km	6,27	1185m
Peyresourde	10 km	6,2	624m
Col de Azet-Val Louron	7,5 km	8,27	620m
Hourquette D´Ancizan	10,3 km	7,80	805m
Tourmalet	17,20 km	7,37	1268m
Luz Ardiden	14,7 km	6,87	1010m
Col de Spandelles	15,50 km	5,97	927m
Col de Soulor	12 km	7,5	900
Aubisque	8,1 km	3,32	307m
Marie Blanque	15 km	4,1	615m
Lourdios Ichere	5,3km	6,1	325m
Col de Labays	15,4 km	6,02	928m
San Martingo Harria	4,5 km	5,6	255m
Lazar	12 km	2,6	314m
Larrau	10,8km	6,44	695m
Bagargi	10,1 km	8,15	823m
Izpegi	8,1 km	6,27	672m
Otxondo	8 km	3,8	315m
Lizarreta	11,3 km	3,28	371m
Agiña	8 km	5,94	475m
Aritxulegi	3,5 km	5,5	193m
Jaizkibel	8,2 km	5,37	440m

 Horra, bada, aurtengo erronketako bat. Beste erronka proiektu honen bidez Aspanogirentzako ahalik eta laguntzarik handiena izango da. Erronka dezenteak dira bai... Espero dezagun esaera zaharrak dioena kasu honetan ez gertatzea: joko bezperan, erronka; hurrengo egunean, herrenka.

Irailean ez ahal gara herrenka egongo...

Egitasmoaren eta blogaren nondik norakoak

Blog honen bitartez 2016. urtean bizikletaz egin asmo ditudan entrenamendu, brebet eta distantzia luzeko ibilbideen bizipenak kontatu nahiko nituzke. Badaramatzat urte batzuk distantzia luzeko proba, brebet nahiz zeharkaldiak eginez, baina aspaldi honetan bestelako lehiak ezagutu ditut inguru oso hurbilean (3 minbizia kasu familian). Horrek egoera gogorrak ezagutzeko aukera eman dit; bestek beste, minbizia duten haurrena eta haien gurasoena. Guraso horiek elkarte bat dute, ASPANOGI (minbizidun haurren gurasoen Gipuzkoako elkartea), eta haiei nola lagundu pentsatzen hasita erabaki nuen onena litzatekeela nire kirol jarduna haien zerbitzura jartzea.

Aurtengorako proiektu bat osatu dut  ASPANOGIrekin   elkarlanean. Proiektu honen helburu nagusiak ASPANOGIk egiten duen lan eskerga ezagutzera eman eta elkartearentzat ahalik eta laguntzarik handiena lortzea dira, handia baita  horrelako elkarteek egiten duten lana eta ematen duten laguntza guztia. Dena den,  zoritxarrez, lan hori guztia askotan isilpean geratzen da, eta ez du behar adinako errekonozimendurik jasotzen. Hori dela eta, elkarlanean proiektu bat osatu dugu lehen  aipatu helburuak betetzeko asmoz. Proiektua zeharkaldi eta proba hauek osatuko dute:

 - Alpeetako zeharkaldia (Travesia de los Grandes Alpes). 680km eta 16.500 metroko desnibela.

  - Transpirenaica. Portbou-Hendaia 1.000 km eta 30.000 metro inguruko desnibela.

Alpeen zeharkaldia ibilbide oso ezaguna da txirrinduzale nahiz motozaleen artean. Frantzia eta Suitza artean muga egiten duen Lehman lakuan hasi eta Menton edo Niza herrietan amaitzen da, hau da, Mediterranear itsasoaren ertzean.Guztira  680 kilometro inguru ditu, eta 16.500 metro positiboko desnibela. Ibilbideak aldaera bat baino gehiago ditu, nahiz eta ezagunena eta errepikatuena bat izan. 

Frantziako txirrindularitza federazioak ibilbide hori 8 egunetan egiteko aukera ematen du, horretarako espresuki  sortutako kontrol-txartel baten bidez. Horren ondotik,  hainbat bidaia agentziak ibilbidea 8 egunetan egiteko zeharkaldiak antolatzen dituzte. Nire kasuan, zeharkaldia 8 egunetan egin ordez 2 egunetan egiteko asmoa daukat , gutxi gorabehera, 40 orduren azpitik eta lotarako geldialdirik egin gabe (Non-Stop).  

 Transpirenaican errepidez Pirinioak zeharkatzen saiatuko naiz. Horretarako, Mediterraneo kosta eta Atlantikoa lotuko ditut, 1.000 kilometro pasatxo eta 30.000 metro inuruko desnibel positiboa duen ibilbidea osatuz. Helburua hiru egunetan egin ahal izatea da, hau da, gutxi gorabehera 70-80 ordu inguruan. Ibilbide horretan Frantziako Tourrean hainbestetan igotako portu ezagun eta gogorrenak igotzen saiatuko naiz, Tourmalet, Luz Ardiden, Palheres, Bales, Aubisque eta  San Martingo Harria esaterako.

 Aipatu bi zeharkaldiak egiteko ez dugu oraindik data zehatzik jarri, baina asmoa da uztail-abuztu partean egitea. Zeharkaldi horiez gain, Euskal Herrian antolatzen diren 200,300 eta 400  kilometroko brebetak egin nahiko nituzke, baita pare bat super-brebet ere (600 kilometroko distantzia, eta, gutxienez, 10.000 metroko desnibela duten ibilbide homologatuak).

Arestian esan bezala, blog honetan, besteak beste, brebet  eta zeharkaldi horietako bizipenak kontatzen saiatuko naiz, baina baita entrenamendu saio batzuen berri ematen ere. Izan ere, brebeten eta bizikleta-martxa luzeen mundua ez da oso ezaguna jendearen artean, eta blog honen bidez horiek jendeari ezagutaraztea ederra litzateke.

Dena den, beste ezeren gainetik, egitasmo honen helburu nagusia Aspanogirentzat ahalik eta laguntzarik handiena lortzea da, eta bloga jendeak laguntza hori emateko eta elkarteak antolatzen dituen ekimen desberdinei buruzko informazioa emateko bitarteko bat izango da. Aspanogirentzako diru-ekarpena zein bidetatik eta nola egin daitekeen hurrengo sarrera batean azalduko ditut, gauzak gehiago zehaztuta ditugunean. Bi zeharkaldiei buruzko informazio zabalagoa ere (igaroko diren portuak eta beren datuak) aurrerago emango dut. Pixkanaka...

Espero dut blogean sartzen den edozein zertxobait bada ere entretenitzea, eta hurrengo batean berriro sartzeko gogoz gelditzea. Baina, batez ere, egitasmo honetan parte hartzera animatzea, zalantzarik gabe hori litzatekeelako lorpenik garrantzitsuena. Lehen aldia da blog bat martxan jarri dudala, horrenbestez, esan gabe doa ez naizela gauza hauetan ez aritua, ez aditua. Beraz, pixkanka joango naiz blogari itxura eman eta argazki-irudiak sartzen, ikasi ahala. Erronka martxan da jada...